Isua En

sermon: Isua en

shalom (Champhai Vengthlang North Kohhran Chanchinbu): 17th may 2008

Lk 22:61 “Lalpa chu a hawi a, Petera chu a en a.”

He Bible chânga EN tih hi duhdah taka thil thlir emaw, melh thuak thuak emaw sawina a ni lova; tum nei ran chunga chiang taka en tihna a ni. He thu hi Chanchin |ha Bu dangah a chuang ve lo nain thu danglam tak a ni. Isua khan kha hun khirh tak maiah khan Petera kha a va en kher a. Khatia a hminga ko lova a mita a en ringawt khan chhan a nei ang. A hminga a koh chuan a lo phatsan zo chauh si a a zah lutuk a hlau a ni mai thei. Chuvangin mi dangin an hriat thiam si loh, mahse Petera erawh chuan chiang taka a hriat thiam theih tur siin a en ringawt ta zawk a ni. Isuan Petera a en khan sawi tum tam tak a nei niin a lang. Chungte chu han chhui zui ila:

(1) Lamlettîr duhna rilru pua en a ni: Peteran Isua a hriat ngai loh thu a sawi ta mai a. Chuvangin Lalpa chu a hawi a, Petera chu a en a, “Peter, kha leh chen min zui tawh hnu pawh khan min lo la hre lo cheu a ni maw? Ka hmel hi chiang takin han en la, tunge ka nih han sawi \ha leh teh,” a ti niin ka hria. En nawn a, hriat chian a duh a ni.

(2) Hauh nana en a ni: Isua hi a lungawi chiah lo niin a lang. Dik tak chuan suala kan tlûk hian Pathian hi a lung a awi lo va, zilhhauna thinlung puin min en reng \hin a ni.

(3) Khap nei chunga en a ni: “Peter, tun hun pawimawh lai taka min phatsan si chuan engtikah nge maw min ka tana i pen chhuah anga ka tana i din tehlul ang le? Eng ang Zirtir nge i lo nih chiah? Nang hi paukhauh áwm taka Pathian Fapa ka nih puangchhuaktu leh min phatsan loh turzia puangchhuaktu kha i ni lawm ni?” ti rilru chungin a en niin a lang.

(4) Khawngaih ngawih ngawih chunga en a ni: Isua khan Petera kha lainat takin a en niin a lang. “Peter-khawngaihthlak, i thinlung han chak loh em emzia tak chu aw… ka puih loh che chuan eng i lo va ang lo tak em,” a ti niin ka hria. Ni e, \awng\aiin chaw nghei eng ang mah ila Isua tel lo chuan eng kan lo va ang lo \hin tak em. A nih loh vék leh Isua tel chuan \awng\ai leh chaw ngheite hi a lo va sawt awm ve le.

(5) Kawhhmuh tum nei rana en a ni: Isua khan Petera hriatthiam theih ngei tura chiangin a mitmei a. Chu chuan Petera chu a tih tur dik tak a hriat chhuahtîr ta ngei a, inchhir tawpkhâwkin a \ap ta zawi zawih mai a ni.

Eng kawng zâwng pawha kan phatsan hian Pathian hi a lawm lo va. Suala a mite tlûk chhiat phei chu a duh lo lehzual. Chuvangin Isua Krista meuh pawh a lo kal a ni reng a ni. Nimahsela chuti chung pawhin helhmang misual erawh hi chu a tlu leh nge nge \hin a ni. Amaherawhchu khawngaihna leh hmangaihna avangin, kan tel lova a awm theih loh vang pawh ni hauh lovin, kan inlamlêt leh theih nana hun remchang min siamsakin Isuan min en reng a ni. Phatsan leh tawh lo tur leh, kan phatsan avanga pawi ti tak chungin min en a ni. Chutia a lawm loh avanga inbengdai thei tawh lo khawpa thinrim chhia erawh chu a ni rih lo; a tel lova engmah kan tih theih lohzia a hriat chian em avangin min khawngaih a, englai pawhin min pui turin a inpeih reng zawk a ni. Min puih peih loh hun lai a nei lova. Petera anga inchhíra kan inlamlêt theih nan leh kan inhriat chhuah theih nan awmze nei takin min en reng a ni zawk.

Hawh u, eng pawh kan lo tisual tawh a ni thei: Isua mitmei en thei tawh lo khawpa \hu kun reng lovin, Petera anga Isua mitmei en zâwkin Lalpa lam i hawi leh ang u. Chutah chuan thinlung lungchhiatna dik leh kawng ro su, CHATUAN NUINNA chan theihna a awm a. Chuvangin LAL ISUA lam i en tlat ang u.

H Joseph Lalfakmawia

Bishop’s College.