BUNG 3

bung 3

rinna chungchânga TMEF zirtirna

(i) Hrilhfiahna:

Rohmingliana chuan, “Rinna chu Isuaa awm, Isua ta, Isua nun mihringa rawn cheng, Pathian thu nung, ringtu chhunga lo awm hi a ni,” a ti a.[1] Rinna dik tak chu Isua hnena mi Pathian thilthlawnpêk a ni a, Amah a\ang chauhva kan neih a ni. Chu chu mihringte neihsa rinna hi a ni lo. Chu rinna nung chu Pathianin pek bik a nei lova, mihring zingah a hrethiam leh hrethiam lo kan awm a ni zawk an ti a.[2]

(ii) A Awmzia Leh Nihna:

Rinna hi Pathian leh mihring inkara inbiak pawhna a ni a. Rinna lovin Pathian kan hmu thei lova, kan inzawm thei hek lo.[3] Rinna chu chung lam a\anga lo chhuk a nih avangin a tirah chuan a thianghlim phawt a. Chumi hnu-ah chuan inremna a duh a, a nun a nem a, a tih a nuam a, khawngaihna leh rah \ha-in a khat \hin a, thlei bik reng reng a nei lova, vervekna pawh chu rinnaah chuan a awm lo.[4] Hebrai Lehkhathawn bung 11:1[5] hrilhfiahin rinna chu thlarau lam thutak, mita la hmuh ngai loh Vanram hriat chianna a ni a. A tawi zawnga sawiin rinna chu, Krista nun, Ama hnen a\anga kan neih a nih avangin hriatfiahna thlarau a ni. Thil kan hmuh lohte hriatfiahna tih hi mihring hriatna emaw khawvel thil beiseina emaw a ni lova; thlarau lam thutak a ni tiin Rohminglianan a hrilhfiah.[6]

Pathian (thlarau) leh mihring (thlarau) pumkhata an chen dun leh theihna tura Thlarau Thianghlim hnathawh kan lo chan velleh mihring chhungah lo awmin rinna nung chu a kîr (kal bo) leh tawh lo. Pathianin khawngaihnaa chhandamna min siamsakna Thu Nung kan hriat fuh velleh rinna chu nei turin Thlarau Thianghlimin min sawm a. Kan rilru leh duhthlannate min hminsak vek hnuah Isua nun, Isuaa awm rinna nung chu mihring chhungril thlarauvah a lo awm nghal ta \hin a ni tiin rinna lo awm dan an sawifiah.[7]

(iii) Rinna Zirbingna

TMEF-te hian Rinna hi an sawi thukin an zir chiang hle mai a. Thuthlung Hlui leh Thara hman dan chi hrang hrangte zir chhuakin kawng hrang hrangin an hmehbel bawk a. Khawvel thil leh thlarau lam thil an thliar hran danin a zir deuh vang pawh a ni mai thei, rinna pawh hian lei lam thil leh van lam thil thliar hrangin a lo chhuahna hnâr pawh khawvel leh Pathian a ni an ti mai a. Chuvangin rinna chu chi hnihin an then leh a: tisa thil kaihhnawih ring/rinna (believe/belief) leh rinna nung (faith) tiin. Believe/belief chu mitinte neih sa, khawvel leh tisa thila ‘ring’ sawina a ni a, mihring a\anga chhuak a ni; faith erawh chu Pathian hnen a\ang chauhva kan dawn, rinna nung, thiltithei a ni an ti a. He thu, belief leh faith tih hi inzûl thuakin lang mah se a nihna takah chuan an inpersan tak zetin ze hran daih an nei a ni tiin an sawi \hin. Thuthlung Hlui leh Thuthlung Tharin a hmandan nia an zirtir chu hetiang hi a ni:

A. Thuthlung Hluiah:

Rinna (faith) tih thumal hi Hebrai \awng chuan emun a ni a. Thuthlung Hluiah vawi hnih chiah hman a ni.[8] Pathian thu-in Thlarau Thianghlim kal tlanga a chhandamte rinna sawina a ni. Believe, ring tih hi Hebrai \awngin aman a ni thung a. Thuthlung Hluiah a tam hle. Mihring thu mihring vekin a lo rin sawina atan awih, pawm, tia lehlin a ni. Pathian thu lo thleng a dawngtuin a lo zawmna chu ring tia lehlin a ni bawk.[9] Hebrai \awnga aman tih hi khawvel thil ring (believe) tih sawi nan hman bik a ni an ti bawk.[10] Hebrai chuan chhungril lama Pathiana innghat sawina atan batah an hmang a. Chu chu Greek \awnga pistos a ni a, hei hi Pathian Thu-in mihring a khawih chêt, a hmin vek avanga Pathian âng chhunga tlu lut sawina a ni. Mi mangang, a dinhmun hlauhawmzia leh chhiatzia hre chiangtuin rinchhan tur zawnga inhumhim nana bela tlu lut sawina atan maseh hi hman a ni a.[11] Rin/ring (trust-ringngam) tia lehlin a ni bawk.[12] Heng thumal palite hi Thuthlung Hluiah a hrang \hiauvin hmanna leh awmze hran theuh neia hman an ni tih a lang chiang a. Thu thuhmun leh awmze inang anga ngaih chi a ni lo tiin Rohmingliana chuan a sawi.[13]

B. Thuthlung Tharah.

Rinna thu hi a awmzia leh a kawh tum tichiang thei turin Thuthlung Thar pawhin awmze nei leh mumal takin a hmang a. Thiltih sawina (verb), ring (believe-pistous) hi Hebrai \awnga aman, Sap \awnga believe, Greek \awnga pisteuo a ni a. Khawvel thil chi hrang hrang kan rin \hin sawi nan pawh hman a ni.[14] Rinna (faith) tih thung hi Greek \awngin pistis a ni a, Paulan vawi 142 zet a hmang. He rinna (faith) hi hming (noun) a ni a; amaherawhchu hmuh theih loh (abstract noun) a ni. Chuvangin ring sawi nan hman a ni ngai lo. Chu rinna (faith) chu Hebrai \awnga emun kha a ni an ti a. Chuvangin ngaihpawlh chi a ni lo tiin an zirtir.[15]

Ring tih hi Sap \awngah chuan believe tih a ni a; mahnia ti ve lo, tihsaktu, awltu neih avanga lo \ang ve lo, chawl, awl, chawlhtir tihna a ni. Mihring hlui thiltih chawlhsana Kristaa innghat hmiah hi ring tihna a ni bawk.[16]

(1) Chanchin |ha Bu-ah:

Marka 5:25-34[17] thua hmeichhe thipût hi mihring lam thilah chuan mi beidawng, thih hun nghak mai tawh a nih hmel a. Ama hun laia doctor thiam a pan kim vek tawh hnu pawha zual deuh deuh a ni. A mamawh ber chu damna a ni a. Tihdam theih loh natna a vei avang khan tidamtu mamawhna leh tuihalna thûk tak a nei hmasa a. Chutih lai chuan Engkimtithei Lal Isua chanchin a hria a. Isua chanchin chuan amah a hmin ta vek a. Isua hnen a thlen hma-in a dam tur thu pawh a lo pai lâwk reng tawh a ni. ‘A puan hmawr chauh pawh dek ila tihdamin ka awm ang,’ tih pawh kha a mah a\anga chhuak a ni lova; Lal Isua thu, a chhunga awmin rinna a pek a ni zawk. Thiput nu-in damna a chan nî khan mipui tam tak Lal Isua zawm si lo, anmahni rinna ve satliaha Isua ringtu an awm \euh va. Thiput nu ai mah mahin Lal Isua hi an hnaihin an nek nasa zawk a. A puan hmawr mai pawh ni lo a taksa ngei pawh kal ngaihna hre mang lovin an nek tawt a ni. Rinna nung kawl ve lo an nih avangin Isua taksa daitute mang mang pawh kha tihdamin an awm chuang lo. Thiput nu hnena ‘i rinna i dampui a ni e’ a tiha ‘i rinna’ a tih tak hi hmeichhe thiput-in a neihsa rinna a ni lova, Isua thu a\anga a lo neih a ni. He hmeichhe rinna hi Isua a\anga lo awm ni mah sela i rinna a tihsak tlat hi Pathian khawngaihna a ni tiin Rohmingliana chuan a hrilhfiah.[18]

Lazara kaihthawh thu-ah pawh khan belief leh faith danglamna leh an nihna a sawi fiah a (Joh 11:25-34). Mari leh Marthi khan khami ni-ah kher kha chuan an nutapa kha Isuan a kaihthawh an ring pha lova. Marthii khan Pathian fapa, khawvela lo kal tura chu a ni tih chu a ring (believe) ngei a. Marthiin Isua a rin (na) (belief) kha Lazara tithotu a ni lova. Kaihthawha awm Lazara ber lah kha Isua ring thei lovin a thi tawh bawk si. Chuvangin Lazara kaithotu dik tak chu Pathian Fapa kâ a\anga thu nung lo chhuak kha a ni. Chumi chu rinna tihna a ni tiin Rohmingliana bawk hian a sawi.[19] Lazara kaithotu chu rinna a ni tihna a ni.

(2) Lehkhathawn Lamah:

(a) II Tim 1:13

Krista Isuaa awm rinna leh hmangaihna neiin, thu dik dan ka kaa i hriatte kha nei tlat rawh.

He changin sawi a tum chu rinna (nung) chu Isuaa awm a ni a. Chu rinna nung chu khawngaihna leh Thlarau Thianghlim hnathawhin mihringah a lo che chhuak a. Mihring chu ringtu (believer) an lo ni ta a. Rinna erawh kha chu mihring a ni ve lo. Rinna chu Isuaa awm a ni a, Ama ta ngei kha ringtute hnenah a pe a ni.[20]

(b) Rom 1:16-17

Chanchin |ha chu ka zahpui si lo va; tupawh a ring apiangte tan chhandamna tura Pathian thiltihtheihna a ni si a; atirin Juda mi tan a ni a, tin, Grik mi tan pawh a lo ni leh a. Chu mi-ah chuan rin lehzual nan, rinnain Pathian felzia chu a lo lang a, “Mi fel chu rinnain a dam ang,” tia ziak ang khan.

Paula sawi dan chuan Chanchin =ha chu a ring apiangte tan Pathian thiltihtheihna a ni. Nun thara Isua leh a chhandamna hretute/changtute hi Ringtute an ni a. Pathian thiltihtheihna dawngtute an ni. He chângah hian ring (believe) chu khawngaihna hnathawh, Thlarau Thianghlim tihvarna changtute chungchâng sawina a ni a. Isuaa innghata tlu lutte hnenah rinna nung (saving faith) chu ringtu tichaktu ni turin pêkin kan awm \hin tih a sawi a ni an ti.[21]

(iv) Rinna: Mihring A\anga Chhuak Nge Pathian A\anga Chhuak?

Mihring chuan ama chakna hmangin Pathian a ring \hin a, a ring thei bawk reng a. Amaherawhchu harsatna leh manganna hnuaia a awm meuh chuan a ring lo leh mai \hin. Duh hun huna Pathian rin mai theihna chu mihringin a kawl ngei a. Chutiang rinna chu mihringa chhuak a ni tih Thutaka harh tawhte chuan an ring nghet tlat a ni tiin Rohmingliana chuan a sawi. Isua a thi a, a tho leh a, min chhandam tawh tih thu rin hi Isua thih thu leh thawhleh thu (history) a dik tia rinna mai a la ni a. Bible-in Isua ring a tih hi a la ni lo. Bible-in ring a tih chu kan rin hlawh ni lo, Pathianin a khawngaihna avanga mihringte min rawn zawn chhuahna thu nung a ni a; mihring thlarau, engmah ti thei tawh lo, Pathian lama thi ni tawh chu Thlarau Thianghlimin a rawn tihnun avangin mihring chhungah Isua thlarau lo awm a, mihring hlui rinna leh theihna ni lo, theihna reng reng nei lote hnenah tihsaktu a lo nung ta zawk a. Hei hi ring awmzia (rinna awmzia) chu a ni. Chutah chuan mihring lam theihna sawi tur pakhatmah a awm lo. Bawhchhiat hnuah mihring thlarau chuan chakna reng reng a nei lova. Thlarau Thianghlimin a tihnuna, amaha a chen a\ang chauhvin mihring chu ringtu a ni thei a ni tiin Rohminglianan a sawi.[22] Chumi awmzia chu rinna (faith) chu mihring a\anga chhuak ni lovin Pathian a\anga chauhva chhuak a ni tihna a ni.

Rom 10:17[23] hian hriatna chu Isua Krista thu a\anga lo awm a nih thu min hrilh a. Helaia hriatna tih hi hriatna naran a ni lova, tawnhriat (feel) a kawk a. Chu hriatna chu Krista Isua a\anga la kal a ni a. Isua Krista a\anga hriatna nung lo kal chuan chhandamna zawngtu hnenah rinna a chantir \hin.[24] Rinna chu Isua/Pathian a\anga lo chhuak a ni tih an nemnghehna pakhat a ni. Chutianga rinna pêk thu chu Abrahama te, Mosia te, Elija te leh Davida te, Thuthlung Hlui huna rinnaa mi ropuite nun a\ang hian a hriat theih. Anmahnia rinna awm sa Pathianin a kaihthawhsak a ni lova, a kotu Pathian thu nung an hnena awm ta tlata kha rinna dik an neihna chu a ni zawk an ti bawk.[25] Rom 10:8-10 thu pawh hi Paulan rinna a sawifiahna niin rinna chu kan hnena Pathian thu nung awm sa, kan hriat loh lai pawha min kaihruaitu Pathian thu tak (word of God) hi rinna a ni a. Chu rinna thu nung chu mihring a\anga chhuak a ni lova, lei lung siam hma pawha lo awm tawh Pathian thu kha a ni tiin Rohmingliana chuan a sawi zui.[26]

Lal Isua nun hmu lo, a hriata hriate leh Thlarau Thianghlim khawihna leh a hnathawh pawh chang loten an neih rinna hi sakhaw dang zawng zawngin an sakhua an rinna ang rinna thi, Pathian nen inzawm lo rinna, Pathian pek ni lo, khawvel pek rinna a ni a. Joh 6:65 thua, “Tin, amah vek chuan, “Chuvangin a ni, in hnenah, ‘Pain a puih loh chuan tumah ka hnenah an lo kal thei lo vang,’ ka tih kha ni,” Isuan a tih kha tan chhan pawimawh takah an neih a. Pain a pek loh chuan (a Sap \awng lama a awmze dik zawk) ka hnenah in thleng thei lo a tihna a ni a, chutiang bawkin rinna chu Pathian pek ngei a ni an ti bawk.[27]

(v) Mihringin Pathian A Ring Thei Em?

Pek a nih zet loh chuan mihringin amahin rinna a nei thei lova; nimahsela ama ir-âwm chhuakin a ring thei an ti a. Amaherawhchu chu ama rinna (belief) chu Pathianin a pawm lova, a nungin thil a ti thei hek lo. Rinna dik tak chu Pathian pek a ni a, Pathian thu nung chu a ni bawk an ti a.[28]

Eden bawhchhiatnaah khan mihring thlarau chu hmelma Setanan a tihhlumsak a, a tichhia a, a rûksak bawk a. Thihna a lo thleng ta a. Chu thihna chu thlarau thihna a ni. Kha laia thi kha Pathian an rin theihna lai tak kha a ni an ti a. Tisa chuan la dam mah sela thlarauvah chuan an thi a ni. Mihring bân pahnih bul hian thil a hmu \euh va, a thil hmuh lâk theihna a nei lo ang hian Pathian thute chu kan tisain kan hre \euh va. Kan thu hriat Pathian thianghlimna leh a nun la tur chuan a lakna kut bul ang kan ni a, kan thlarau a tihnun chauhvin kan ring thei a ni. Rinna chu pek thar kan nih loh chuan kan ring thei lo, mitthi kan ni miau va tiin mihringin Pathian an rin theih loh dan an zirtir.[29]

Thlarau Thianghlim chuan ring thei tawh lo mitthi chu ring thei turin a tinung a. Chutianga a tihnun a, a mit a tihvar hnuah chuan mihring thlarau chuan hriatna a rawn nei a. Chu hriatna chu Pathian pek a ni a. Hriatna a neih hnu chuan ring lovin a awm thei ta lova, ring thei lo kha ring lo thei lovah siamin a awm ta a ni.[30]

Rohmingliana chuan Jak 2:25, 26[31] thu hi hrilhfiahin rinna thu nung, mihring tithianghlimtu kan chan hnuah chauh taksa thiltih avangin Pathian hmaah leh mihring hmaah mifel nih kan lo hlawh thei \hin a ni a ti.[32] Hei pawh hi Pathian a\anga rinna lo chhuak \anfung bawk a ni.

TMEF-te chuan Martin Luther-a te,[33] William Shedd-a te,[34] Donald Grey Barnhouse-a te,[35] Synod of Dort te, leh Westminster Confession of Faith te behchhana hmangin (hmang intiin) Pathianin a pek zet loh chuan mihringin Pathian a ring thei lo tiin an zirtir \hin.[36]

(vi) Pathianin Mi Zawng Zawng Hnenah Rinna A Pe |heuh Vem?

Pathianin mi zawng zawng a hmangaih vek nachungin mi \henkhat hnenah chauh rinna a pe a. Entir nan Mk. 5:25-34-a kan hmuh ang hian mipui tam tak zinga hmeichhe thiput chauh tihdam a ni; a chhan chu kha hmeichhia ang khan mipuite kha rinna pek an ni ve tlat lo.[37] Mi thenkhatte chu Thlarau Thianghlim khawihna leh rinna chang ve lo an awm. Chu’ng mite chu Pathianin thliar bik a neih vanga khawih lohte an ni lova, thu an ngaihthlak lain Setanan an thlarau nun a lo tihdelsak \hin vang a ni (II Kor 4:4) tiin an sawi a.[38] A reng reng thuah rinna chu Ringtute hnenah chauh pek a ni.[39] Joh 6:30-ah [40] hian Isua ring thei lotuten an rin theih dan tur an zawt a. Rin theihna tur manna a pek ve hunah an ring thei chauh ang tiin Isuan a chhang a. Isuan amah ngei chu van a\anga chhang nung lo chhuk a nih thu a sawi a. Chu chhang nung chu anmahnia a awm hun hunah an ring thei dawn a ni tih a sawi.[41]

Rom 11:1 leh 9:19-26[42] thua a sawi ang hian rinna chu mi zawng zawng hnenah a pe lovin pek a ba lo bawk. Nun thar neia Pathian tihtute hnenah chauh pek a ni. Chubakah mi zawng zawng rinna nung a peksa vek chuan Chanchin =ha hril a tul lovang a, a pek lohte hnena hril zel a, pek zel a tum hi keini hlut vena awm chhun a ni an ti.[43]

Mihringin Pathian a ring thei lova, ring inti \hin mah se chu a rinna chu rinna thi, Pathian pawm loh mai a ni. Chuvangin rinna chu mihring a\anga chhuak a ni lova, Pathian hnen a\ang chauhva chhuak a ni tiin an zirtirna chu a khaikhawm theih ang.

Duhna zalên, Duhthlanna zalên leh Rinna chungchâng TMEF-ten an zirtir dan tawi leh fiah takin kan tarlang ta a, an zirtirna hi zirtirna dik a ni reng em tih kan la chhui zel dawn a ni.

---

[1] Ibid., 77.

[2] Ibid., 74.

[3] Rohmingliana, Zion Panna, 80.

[4] The Truth Mission Evangelical Fellowship, TMEF Evangelists Sermon (Aizawl: TMEF Evangelical Board, 2001), 175, 176.

[5] Tin, rinna hi thil beiseite awm ngeia hriatna, thil hmuh lohte hriatfiahna a ni.

[6] Rohmingliana, Hebrai Zirlai Puitu, 71.

[7] Rohmingliana, An La Varpawh, 74, 75.

[8] Deut 32:20; Hab 2:4. Cf. Rohmingliana, Theological Debate, 7.

[9] Gen 15:6, 45:26; Ex 4:1-5, 8-9, 31, 14:31, 19:9; Num 14:11, Deut 1:32 etc. Cf. Rohmingliana, Theological Debate, 7.

[10] Ibid.

[11] Rohmingliana, Theological Debate, 8.

[12] Ibid., 14.

[13] Ibid., 8.

[14] Ibid., 8, 73, 74.

[15] Ibid., 73, 74.

[16] Rohmingliana, An La Varpawh, 76-77.

[17] Tin, hmeichhe pakhat kum sawm leh kum hnih thi putin a dam lo va, daktawr tam tak lakah nasa takin a tuar tawh a, a neih zawng zawng pawh a dekral zo tawh a, \hathnem ahnekin a lo zual zawk mah a; chu mi chuan Isua chanchin thute chu a lo hria a, a hnunga mipui zingah chuan a lo kal a, a puan chu a dek a. “A puan chauh pawh dek ila, tihdamin ka awm mai ang,” tih a rilruk a ni. Tin, chawplehchilhin a thi put chu a reh ta nghal a, a na chu tihdam a ni tih a taksaah a inhre ta a. Tin, Isua chuan a chhung ata thiltihtheihna chhuak \hin chu a chhuak tih a lo hria a, mipui zingah chuan a hawi vel ta nghal a, “Tunge ka puante dek kha?” a ti a. Tin, a zirtirte chuan a hnenah, “Mipuiin an nek huai huai che hi i hmu si a, ‘Tunge mi dek?’ engtiziaa ti nge i nih leh?” an ti a. Tin, ani chuan chu mi titu chu hmuh tumin a en vel a. Chutichuan hmeichhia chuan a chunga thil a tihsak chu hriain, hlau leh khur chungin a lo kal a, a hmaah a bawkkhup a, a hnenah thu dik takin a hrilh ta vek a. Tin, ani chuan a hnenah, “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” a ti a.

[18] Rohmingliana, Theological Debate, 25, 26.

[19] Ibid., 26.

[20] Rohmingliana, Theological Debate, 27, 28.

[21] Rohmingliana, Theological Debate, 42.

[22] Rohmingliana, An La Varpawh, 78-80.

[23] Chutichuan rinna chu hriatna avangin a lo awm \hin a, tin, hriatna chu Krista thu avangin a lo awm.

[24] Rohmingliana, Theological Debate, 9.

[25] Ibid., 15.

[26] Ibid., 44.

[27] Ibid., 21.

[28] Ibid., 67.

[29] Rohmingliana, An Zawhna, 105-107.

[30] Ibid., 108.

[31] Chutiang bawkin Rahabi nawhchizuar pawh khan tirhkohte kha a lo lawm a, kawng danga a hawntir lai khan thiltih avangin thiam a chang a ni lawm ni? Thlarau tel lovin taksa chu thi a ni, chutiang bawkin thiltihte tel lovin rinna pawh chu thi a ni.

[32] Rohmingliana, Ringtu Thiltih (Aizawl: Literature & Publication Board, 2002), 24.

[33] Luther-a sawi dan chuan mihring chu tuia tla, amaherawhchu thlarau lama a thih tlat avanga tuia tla tih pawh inhre thei lo ang hi a ni a. Pathian khawngaihna lo chhuak tak ngial pawh chu a pan thei lo a ni. Chuvangin Pathian chuan ama duhthlanna ngeiin mihringte a chhanhim ta zawk a. Chu chhanhimna chu mitthi mai ni tawh tinung leha ring thei tura rinna pein a thawk zo tawh a ni a ti a. Erwin Lutzer, The Doctrines that Divide (Secundarabad: OM Books [1989], 1998), 174, 175.

[34] William Shedd-a hi American Pathian thu thiam a ni a, “A rin vang ni lovin; a rin theih zawk nan khawngaihna chu misual hnenah a lo lut a ni; a chhan chu kha rinna kha Pathian thilpêk a ni tlat a ni,” tiin a sawi. Quoted by Lutzer, 158.

[35] Donald Grey Barnhouse-a chuan ‘nung turin rin a ngai (faith precedes life) tih hi ngaihdan dik lo a ni a, Bible chuan a nun hnu-ah a ring chauh tih min zirtir a. Mihring chuan a ring thei lo mai ni lovin a duhna (will), a rilru (mind) leh a \hinlung (heart) te chu an chhia a, Pathian chu a hre thei lova, a tilawm thei lova, a hrethiam thei hek lo’ tiin a sawi bawk. Quoted by Rohmingliana, Theological debate, 110 from Donald Grey Barnhouse, The Invisible War, 94.

[36] Rohmingliana, Theological Debate, 108-111.

[37] Ibid., 25.

[38] Ibid., 30.

[39] Ibid., 69.

[40] Tin, anni chuan a hnenah, “Chhinchhiahna engnge i tih ang, kan hmuha kan rin theihna tur chein? Thil engnge i tih ang?…an ti a.

[41] Rohmingliana, Theological Debate, 86.

[42] Rom 9:19-24: Nang chuan ka hnenah, “Engati nge a la dem cheu ni? A duhzawng tuin nge dodal ni?” i ti dawn a ni awm e. A ni, nimahsela aw mihring, Pathian hnial veitu chu tunge maw i nih le? Thil siam chuan a siamtu hnenah, “Engati nge hetianga mi siam?” a ti ang em ni? Bellei tlang khat bel pakhat hlu tak, bel pakhat hlu lo taka siam turin belvawtu chuan bellei chungah thu a nei lo vem ni? Khawngaihna bel, ropui tura a lo buatsaih lawkate chungah chuan a khawngaihna ngahzia a entir theih nan, \hinurna bel boral tlakte chungah chuan, Pathianin a \hinur leh a thiltihtheihna lantir duh mah sela, a dawh hram hram chuan engnge pawi ang? (Chu khawngaihna belte chu Judate zing ata chauh ni lovin, Jentailte zing ata pawh kohte kan ni.).

[43] Rohmingliana, Theological Debate, 100.